2023/6/21
• Getxo Jazzak 18 emanaldi hartuko ditu ekainaren 28tik uztailaren 2ra
• Doako saioak Algortako Geltokia plazan izango dira eta Muxikebarri zentroak ordainezko eskaintza hartuko du
Ekainaren 28tik uztailaren 2ra bjitartean, Getxok berriro irekiko du jazzaldia Euskadin, Bizkaiko jaialdiaren 46. edizioaren eskutik. Ohi bezala, talde gazteak eta nazioarteko artista nabarmenetako batzuk izango dira bertan. Izen ezagunenen artean, Al Di Meola, Dave Holland, Jazzmeia Horn, Kurt Elling eta Marc Ribot nabarmendu behar dira. Abonu kontzertuei Talde Lehiaketako banda gazteen emanaldiak, ‘Hirugarren Milurtekoa' atala eta familientzako kontzertuak gehitu behar zaizkie.
Jazzaldia aurkezteko gaur egin den prentsaurrekoan, Getxoko alkate Amaia Aguirrek nabarmendu du aurtengo Getxo Jazzaren eskaintzak «kalitatea eta aniztasuna» dituela ardatz nagusi. Bestalde, Lorea Bilbao Euskara, Kultura eta Kiroletako foru diputatuak azpimarratu duenez, Getxok «nazioarteko jazzaren onena biltzen du», eta horrelako ekitaldiek «musikarekiko eta kulturarekiko interesa sortzen laguntzen dute». Jaialdiaren arduradun Iñaki Saituak azaldu duenez, jaialdiak «izen handien maisutasuna eta belaunaldi berrien presentzia uztartzen ditu», eta 46. edizioan Getxo Jazzek musikarien kopuru errekorra izango duela nabarmendu du, «agertokietan 100 artista baino gehiago jarriz».
Abonu-kontzertuei dagokienez (Muxikebarri; 21:00), Jazzmeia Horn (1991, Dallas, Texas) abeslari gazteak irekiko du aurtengo edizioa. 2015ean Thelonious Monk International Vocal Jazz Competition eta 2013an Sarah Vaughan International Jazz Vocal Competition irabazi zituen. Abeslari honek bere benetako esentziari buruz hitz egiten duen izen bat du. Artista sortu berriaren ospea berehala iritsi zen New Yorkera, eta laster hasi zen sidewoman gisa jotzen musikari nabarmenekin: Winard Harper, Junior Mance, Billy Harper, besteak beste. 2017an, Hornek "A Social Call" izeneko bere lehen albuma kaleratu zuen, 2017an 1. postuan sailkatu zena eta 2018an Grammy baterako izendatu zutena. Bere hurrengo albumak, "Love & Liberation" izenekoak, 2020ko Grammy sarirako bere bigarren izendapena ekarri dio Horni, jazz disko bokal onenaren atalean.
Hurrengo egunean, hilaren 29an, osteguna, Kurt Ellingen txanda izango da (1967, Chicago). Grammy sariko irabazle bikoitza, Elling, munduko jazz abeslari garrantzitsuenen artean leku bat ziurtatu du. Bere ahotsa berehala ezagutzeko modukoa da, entzuleak bere baritono bero eta aberatsarekin besarkatuz eta inprobisatzaile bertutetsu eta kontalari sinesgarri bezala lau zortzidun bere gama osoa zeharkatuz. Bira eta grabazioen hogeita bost urteetan hiru Prix du Jazz Vocal (Frantzia) irabazi ditu, bi Echo sari alemaniar, bi Edison sari holandar, eta 15 izendapen lortu ditu Grammy sarietan. Gainera, kritikaren eta musika-argitalpen ospetsuen sari ugari jaso ditu, hala nola Urteko Gizonezko Bokalistarik Onena.
Ostiralean, hilak 30, jaialdiaren erdialdean, Marc Ribot arituko da, nazioarteko gitarra-jotzaile garrantzitsuenetako bat, 40 urte baino gehiagoko ibilbidean bere izenpean 25 disko baino gehiagorekin. Oraingoan Getxora etorriko da Ceramic Dog hirukote leherkorrarekin. Free-jazz eta punk-funk estiloko talde esperimental deitzen da eta Ribotek (gitarra eta ahotsa) Shahzad Ismaily (baxua, teklatuak eta koruak) eta Ches Smith (bateria, perkusioak, elektronika eta koruak) bildu ditu. 2008an kaleratu zuten lehen diskoa, Party Intellectuals, eta ondoren Your Turn, 2013an, eta YRU Still Here?, 2018an.
Laugarren egunean, jaialdiak Al Di Meola (Jersey City, New Jersey) gitarrista handia hartuko du, ezaguna jazza munduko musikekin -flamenkotik hasi eta mediterraneoko soinuetara- eta poparekin bat egiteagatik. Ia berrogeita hamar urteko ibilbidearekin hainbat aintzatespen lortu ditu, hala nola Grammy sari ugari, Montrealgo Jazzaldiak ematen duen Miles Davis ohorezko saria, BB saria edo Hungariako Fundazioak Arte Eszenikoetarako ematen duen Lyra saria, eta izendapen eta Grammy sari ugari) bai bakarka, bai gitarraren beste mito batzuekin batera, hala nola Paco De Lucia eta John McLaughlinekin batera.
Uztailaren 2an, igandea, Getxo Jazzek agur esango dio publikoari Dave Holland (1946 Wolverhampton, Staffordshire, Ingalaterra) baxu-jotzaile, konposatzaile eta orkestra-zuzendariaren eskutik. Baxu akustikoan eta elektrikoan 50 urte baino gehiagoko ibilbidea izanik, Hollandek ohore handienak irabazi ditu, Grammy sari ugari eta NEA Jazz Master titulua barne. Famatu egin zen Miles Davis, Stan Getz, Sam Rivers, Betty Carter eta Anthony Braxton bezalako elezaharrek gidatutako talde berritzaileetan, baita kolaborazioetan ere.
Talde handien aurretik, Talde Lehiaketaren finalera iritsi diren lau taldeak arituko dira, eta, beste behin ere, Europako jazz gaztearen lanaz gozatu ahal izango dute ikusleek. Doako eskaintzaren barruan, berriz, Algortako Geltokia plazako Hirugarren Milurtekoa ataleko kontzertuak daude (19:00), eta inoiz baino nazioartekoagoa den proposamen batean bilduko dituzte Olatz Garcia-Ergüin abeslaria (oraingoan Miguel Salvador pianistak lagunduta), Muriel Grossman Quartet, Triskel Trio, Matthias Van den Brande Trioy Michele Bonifati Emong. Horiei familientzako kontzertuak gehitu behar zaizkie (Algortako Geltokia plaza, 12:30), Jazz for Kids proiektuaren eta Euskadiko Ikasleen Jazz Orkestrako instrumentista gazteen eskutik.