FOLK GETXO BBK 2017 - 33. Nazioarteko Folk Jaialdia

Irailaren 28tik urriaren 1era

Egitaraua ikusteko, sakatu hemen

Sarrerei buruzko informazioa hemen

 

Nazioarteko Folk Jaialdiak aurten bere datak aldatuko ditu: hogeita hamahirugarren edizio honetan irailaren 28tik urriaren 1era egingo da. Betiko moduan, kalitatezko programa bat, askotarikoa, izango da gure apustua. Musikaren eskutik, beste kultura batzuk ezagutzeko parada izango dugu.

Kontzertu nagusien proposamenaren barruan, aurten Niamh Ní Charra biolin jotzaile eta abeslari irlandarra, The Chieftainsen ohiko kolaboratzailea, izango dugu gurekin. Aurtengoan, Getxon, bi euskal artistak lagunduta joko du: Ibon Koteron eta Xabi Aburruzaga.

Bigarren egunean, flamenkoaren ahotsik garrantzitsuenetako bat ekarriko dugu geurera: José Mercé. Artisten segida luze baten oinordekoa da eta bere artea sakon-sakonean ezagutzen du. Bere karrera hasi zuenetik (duela berrogei urte baino gehiago), Jerez de la Fronterako cantaor honek bere balioa erakutsi du mundu osoko agertokietan eta disko famatuetan, hala nola, “Del amanecer” eta “Aire”.

Eta 30ean, Souad Massi abeslariak, Aljeriako musikarien belaunaldi berri bateko kideetako batek, hartuko du txanda. Massi gaur egungo ahots mediterraneo hunkigarrienetako bat da. Soinu-unibertso zabal bat hartzen du barruan, Ipar Afrikako chaabi-tik abiatuta, arabiar-andaluziar tradiziotik igaroz, eta folkeraino.

Azkenik, Kukai Dantza konpainia saridunak amaiera bikaina emango dio jaialdiari, "Lotuneak" proiektu bereziaren bidez. Proiektu integratzaile honek, dantzaren eta musikaren bitartez, artista-sorta zabala batuko du, besteak beste Carlos Núñez gaita jotzailea, María Berasarte abeslaria, Iñaki Salvador piano jotzailea, Xabier Zeberio eta gehiago.

Arratsaldeko emanaldietan, Getxo Folkek proposamen heterogeneoa egingo du; Trivium Klezmer-en erritmo sefardi eta balkandarretatik , Bruna Sonoraren soinu iberiar, mediterraneo eta garaikideen nahasketaraino, Voces Navarras-en jotak eta Mara kantari portugaldarraren fadoak ahaztu barik.

Gainera, ostiraleko eta larunbateko kontzertu nagusiak amaitzen direnean beste bi emanaldi izango dira. Lehenengoan, Getxo Folkek estreinako aldiz hartuko du Los Texmaniacs Texaseko taldea, tex mex soinuaren erreferentzia dena. Max Baca da zuzendaria, urte batzuetan Flaco Jímenez handiaren laguntzaile izan zena. Bigarrenean, Nakany Kanté abeslariak hots afrikarrak ekarriko dizkie ikus-entzuleei.

Jaialdiaren musika-eskaintza osatzeko, "Musika ari du" haur ikuskizuna dago, agertoki berean Euskadiko Orkestra Sinfonikoaren hari-laukotea eta Pirritx, Porrotx eta Marimotots pailazo famatuak elkartuko dituena. Folk Getxoren hitzorduan ere beste jarduera batzuk izango ditugu, esate baterako Espazio Solidarioa, Munduko Artisautzen Merkatua, Munduko Terraza eta haren gastronomia-eskaintza koloretsua. 

Berriak

Getxoko Nazioarteko Folk Jaialdia

José Mercé, Niamh Ní Charra, Souad Massi eta Kukai Dantza ariko dira saio nagusietan (Irailaren 28tik urriaren 1era)

Esta web utiliza cookies, puedes ver nuestra política de cookies, aquí Si continuas navegando estás aceptándola
Política de cookies +